Karel se Gedigte  ::  Afrikaanse Digters  ::  Ander Digters  ::  Boeke  ::  Skakels  :: Kontak  :: Tuis

Wat is die Versindaba?

Vanjaar se Versindaba sal op 06, 07 & 08 September in die HB Thomteater op Stellenbosch plaasvind, in samewerking met Die Woordfees.  Van ons mees prominente Afrikaanse digters van wie daar onlangs digbundels verskyn het, vorm deel van die program.  Hieronder tel bekendes soos George Weideman, Jeanne Goosen, Dolf van Niekerk, Hans du Plessis, Joan Hambidge, Marlise Joubert, Cas Vos en HJ Pieterse. Ontluikende digters wat ook deel van die program uitmaak, is die opwindende hip-hop digter Jitsvinger, asook die rapmeester Willem Fransman (jnr.), Andries (Roof) Bezuidenhout, Gilbert Gibson en Charlton Lee George.  Breyten Breytenbach en TT Cloete, van wie daar onlangs bundels verskyn het, maar wat ongelukkig nie by die Versindaba teenwoordig kan wees nie, se verse sal onderskeidelik deur Ampie Coetzee en Helena Conradie voorgedra word.  Johann Nel, bekende woordkunstenaar, sal ’n program rondom die poësie van MM Walters en wyle RK (Ronnie) Belcher aanbied.  Hans du Plessis se verse sal deur Jo-Marie Nel voorgedra word.

Soos in die verlede word die voordragte afgewissel met onderhoude, besprekings en musiek. Die musikale komponent word vanjaar tot ’n besonderse hoogtepunt gevoer, met optredes deur Jak de Priester, Anton Goosen, Philip de Vos, Niël Rademan, en Riku Lätti.  Poësieliefhebbers kan ook uitsien na die unieke voordragstyl van David Ferguson (van “Three White Men”–faam), asook Sleursange, (teks deur Marlise Joubert en regie deur Mareli Hattingh) wat deur die studente van die US Dramadepartement opgevoer gaan word.  Liefhebbers van die kunslied kan gerus kennis neem van Marica Otto se optrede tydens Sessie 2.  Nog ’n besonderse bydrae tot die program is die Dana Mouton-lesing wat vanjaar deur prof. Lina Spies gelewer word.  Sy sal praat oor die tema “Wat is poësie?”

'n Verdere toevoeging tot vanjaar se program is die gesprekke tussen digters oor hul werk en werkswyse. So gaan George Weideman en Hans du Plessis met mekaar gesels, asook Dolf van Niekerk en Lucas Malan. En dan is daar ook die bekendstelling van Bandelose gedigte 1977-1990, gedigte deur Luuk Gruwez wat deur HP van Coller na Afrikaans vertaal is.  Dié bekendstelling sal tussen Sessies 3 en 4, te wete 13:00 tot 14:00 wees in die voorportaal van die HB Thomteater.  Bernard Odendaal sal die gesprek met Hennie van Coller lei. Toegang is gratis.

Kaartjies vir Donderdag-, Vrydag- en Saterdagaand is R60.00 per persoon. Die sessies Saterdagoggend en –middag is R20.00 per persoon. Spesiale tariewe is beskikbaar vir studente en skoliere. Kaartjies is verkrygbaar by Protea Boekwinkel op Stellenbosch en kan óf telefonies by (021) 882 9100 óf per e-pos via proteaboek@mweb.co.za of ls.protea@mweb.co.za bespreek word.

(terug)

Program

(terug)

(terug)

(terug)

(terug)

(terug)

© Kopiereg - Karel Ark, Alle regte voorbehou