|
| Pieter Bonthuyzen |
|
1. Griffelpen
|
|
Griffelpen Griffelpen, griffelink, Woord met geur, woord wat stink. Pen wat op papier kan lek Magtig is die woorde uit jou bek. Swarte kol of die g se krul, Woord van waarheid, woord wat kul. Veerpen in die hand se mag, Wie gaan huil en wie sal lag? Vind jou weg op grys papier, Lek jou woorde tog sekuur. Pen van oordeel, pen van hoop Kies wys die rigting wat jy loop. Elke strepie los ‘n merk, Raak die hart in die diepste plek. Skryf dan gou jou laaste wens, O, griffelpen van die hartseer mens. Lek jou laaste woord van hoop Voordat jou ink dalk uit sal loop. Wie se hart sal jy dan raak, Met die woorde wat jou inkbek maak? (terug) My Tent My hart is my tent, My tent is my huis. Oral waar ek trek, of reis, Dis hier waar ek mos bly. My tent is maar eenvoudig, ‘n Lapkaia vir ‘n huis. Na onrus dae en stormwind, Kom voel ek veilig. Tuis. Soms is my tent verlig, Ander dae bewolk en grys Soms is my tent ook deurmekaar Maar weet jy, dis my huis. Daar woon kinders, hiér, in my huis Hul skaterlag weergalm bly Moddervoete of tranedal Hier is my kinders tuis. Wanneer alles dag-end rus Steek ek wierook op in my huis Die geur van genade, tevrendenheid, Maak van my lappe-tent, ‘n Arm-mans paleis. (terug) Hart se punt My hart se punt. Hier sal jy prente vind. Skaterlag in verf gekleur Met tjoklithandjies Teen my hart se deur. Daar lê speelgoed Op my hart se vloer. Gesiggies wat van agter Gordyne loer. En vrae wat In die gange hang Hul grootword Maak my skielik bang. My hart se punt. Hier sal jy my kinders vind Grendelkluis, ‘n pa se hart Skuilplek vir ‘n tweeling-hart (terug) Wie sê? Wie sê ‘n man mag nie huil nie? Wie sê hy mag nie in sy trane skuil nie? Maar eers wanneer sy hart, nat, oor sy wange rol Word die hart weer skoon, en sy beker vol. (terug) Boeretroos Koffiekoppie, boeretroos Sterk. Swart. Bodemloos Boeredoepa as die moer so trek Jy hou my wakker, jy maak my sterk. O, boontjie-sap, jou wille ding Dis oor jou dat ek nog ‘n slukkie skink Roer jou soet, roer jou stout Netnou, netnou, staan jy koud. Oor jou bekerbek is veel gepraat Van soggens vroeg tot sawens laat O, koffiebeker, as jy kon praat Deel met my jou wyse raad. ‘n Teugie aan die boontjiesap Laat my bietjie in die tyd afstap. Nostalgie en stowwerige gosie, Verlore in my boeretrosie. ‘n Plaaskombuis met kolestoof. Die eensaam lied van die ketel loof die kosbare vrug, o koffieboon, Wat ‘n boer vir sy dag se werk beloon. Vereelte hand wat om die beker klou Krampagtig aan dié troos vas hou. Ja. Troos. Krag. Liefde. Als lê daar in boeretroos. (terug) Klaas Verlaat Op ‘n ou roes blik, sit Klaas Verlaat. ‘n Alleen-geteug aan sy twakpyp-speen. En Klaas het g’n kind of kraai of maat. Voor sy kaia, sit ou Klaas. Sy gedagtes lê doer op die horison. Onder die Kalahari bliksemson. In Klaas se oë kan jy die jare tel Daar’s verhale in die plooie op sy vel Sy tuur is stip, oor die boesman-veld. Vir Klaas Verlaat maak alles sin Sy hoop is groot, sy besittings min Maar Klaas, ja… Klaas se hart is skoon. Klaas se genade kom van Bo, Uit sy vertel kan jy maar glo, “Daai Grootste Hand,my Kroon, Dis Hy, wat ou Klaas so mooi beloon” (terug) Vergifenis Dit weeg so swaar soos goud, Sy gewig maak soveel mense oud, ‘n Bitter smaak draai in jou mond, Dit vreet verbete aan die hart se wond. Dit is eintlik relatief verniet, As jy dit in iemand se hart uitgiet Hardkoppigheid en trots raak suur En die terughou daarvan so peperduur. Onvergifenis bly nes kanker klou Dit vreet jou siel en los jou rou. Dit kom nie uit jou eie krag, Op jou knieë sal jy vir God moet wag. Vergewe mens, dit maak jou vry! (terug) Skeur As liefde skeur….. Ons staar na mekaar Deur die trane deur En staan tussen skerwe wat flenters lê Dis die stilte in die mond wat alles sê. Ons skuil dalk agter seer In ons eie grot. Maar ons bid vir krag Van dieselfde God. Wie was reg, En wie verkeerd? Sal God die meriete In ons harte meet? Maar ons, in ons flenter-tyd Hou God tog albei van ons vas Miskien, sal Hy tog verstaan Dat ons harte, eenmaal, net nie pas. (terug) |
| © Kopiereg - Karel Ark, Alle regte voorbehou. Pieter Bonthuyzen hou die kopiereg van die gedigte op hierdie bladsy. |