Mariska Bouwer

Mariska Bouwer

Daardie plek
As jy eerder op die blou van daarbo kon loop
Kon uitstyg bo moederaarde
wat haar alles- kom- tot- niks aan ons verkoop
en 'n plek kon vind waar jy nie hoef te vrees
want die vuur van God se oë ken mos jou eintlike waarde,

Swaartekrag hou jou voete op die oppervlakte
nerens te vlug, vorentoe, nooit terug
maar versigtig wees
stewig op hierdie vuil grond geanker
want soos 'n klip sink in water
kan haar sonde jou verswelg

Kyk op na daardie blou jou nou nie beskore
en huppel want jy en HY is gebore
HY met voete wat op grond en see kan loop
daarom sal jy eendag
op blou kan trap
al langs die wolke - wolke paadjie af
tot daardie plek
waar God se oë sag na jou kyk.

(terug)

Brandewyn Beloftes
'n Graaf vol grond vir jou my pappa-lief
met die klank wat kletter teen jou kis
vuil sole trap oor jou begrafnisbrief
en skynheiliges sanik oor jou vredesrus

Genadeloos gooi ek nog grond in jou graf
En skinderskaduwees hang oor my graaf
Is ek dan ook dood of maak-maak braaf?

Maar ek dink terug aan nog 'n brandewyndag
Waar ek beloof’t kanker steel nie my lag
Want jy het gesê as Hy jou wil hê
dan moet Hy jou kom haal

en een brandewynbelofte
is 'n klein prys om te betaal

(terug)

Padkaart
Daar was 'n vuur in jou oë wat net die kalm waters van hierbo kon blus
toe die lyne op ons kaart gekruis het en jy voor my kom staan

verlore verdwaal verwerp
in jou rebelstad en ek staan wragties met 'n kompas in my hand.

jou liefde het soos 'n rankplant om my voete gegroei
jy het my naam geroep en ek die veiligheid van jou arms gesoek

liefde het geen gebrek
maar gebroke het ons baklei
vir die jou en my
toe ons besef

die padkaart was verkeerd

En steeds skets ek jou met my huis in jou
En my swakheid toegevou in jou hand
Want jy het stywer vasgehou
al was jy self op die rand

forever se ek en ever
sê jy

sal ons gebroke sonder gebrek baklei

(terug)

Giggel
Bring vir my jou siel kaal
en verf daaroor net een lagie normaal
vir die oog se kleur

sit 'n strikdas op jou persoonlikheid
laat hy voor loop en oopbek lag
vir die swoeg en sweet van vandag

Stel jouself voor as bekend
en knik jou kop as jy sê ja
wag 'n bietjie, wag 'n leeftyd

tot 'n giggel jou inspireer

(terug)

'n Dans saam die duiwe
Soos 'n engel wil ek my vlerke uitsprei
Sodat my liefde aan jou hart kom raak
Maar my aardse foute keer my
Regte engele is mos volmaak

As ek dan nie saam die engele kan sing
Dan dans ek saam die duiwe op die gras
Hoe ook al, vir jou wil ek vreugde bring
Op elke manier wat jou sal pas

Jou liefde maak my vry
Ek is nou alles wat en nog altyd wou wees
Jy verander die wereld vir my
Ek is nou net siel, vergete is die vlees

Terwyl ek op die maat van musiek sweef
Koer die duiwe 'n liefdeslied
Jy is die rede waarvoor ek leef
maar liefde is al wat ek jou kan bied

(terug)

SPROKIE
Net…
my oë begryp die swartnag se sprankelgode
aan die eensaam-een-kantlyn sien ek die oseaan
se blou en laat my dit nou verstaan, waarom
is die kennis verbode en slinger die raaisel dronk,
dronk om jou Briesend kwaad sal
ek bly in woedewinter verkluim my siel in
die grys van jou oë het 'n hart 'n leuen
geglo Hulle praat van engele met
vlerke wit soos sneeu en praat van 'n
man aan kruis gebloei en ek het vir jou in
twee geskeur en die vuurvlamme van verlange
het my meegesleur
tot
daar
diep
Waar ek hoop jy is Waar ek hoop die waarheid rus
My prins, jy laat my droë trane huil, want jy wil weet
waar sneeuwitjie skuil sy hoer op haar eie troon laat begeerte
groei Kom vinnig vyand gedagtes….nader…
dis tyd om oor hierdie lewe te vergader….
nader…tot die slotsom gekom dat daar gif
in jou are vloei
en ek skreeu, vir, na, oor, vir jou
jy spoeg woorde uit, braak oor my kaalvoete,
die waarheid, waardigheid uitgesmyt
en nou my prins lê ons verhaal

NET IN GOD SE BOEKE

(terug)